Jemin Shera, i akuzuar si organizator i vrasjes së biznesmenit Behar Sofia, do të gjykohet në mungesë në gjykatën e Posaçme.
Sipas News24, procesi për të pandehurin ishte pezulluar për një vit, sikurse parashikon ligji dhe gjatë kësaj kohe pavarësisht kërkimeve, policia nuk mundi ta vërë në pranga të akuzuarin.
Në këto kushte, këtë të enjte, Gjykata e Posaçme vendosi të nisë procesin gjyqësor kundër tij. Në seancë gjyqësore gjykata relatoi se vëllai i të pandehurit kishte deklaruar se nuk kishte dijeni për vendndodhjen e tij, ndërsa në shtëpinë e Sherës në zonën e Zall Hjerrit, nuk është gjetur asnjë persona.
SPAK tha se nga hetimet ka rezultuar se Shera e ka marrë porosinë për të ekzekutuar Behar Sofinë dhe për ta realizuar vrasjen ka krijuar grupin kriminal.
Pjesëtarët e grupit e kanë vëzhguar shënjestrën e tyre për gjashtë muaj më radhë deri në momentin kur e ekzekutuan mëngjesin e 25 shkurt të vitit 2021, në afërsi të piramidës në Tiranë.
