Policia e Gjirokastrës ka zbardhur vrasjen e 72-vjeçarit F.A. në Memaliaj, trupi i të cilit u gjet i pajetë të martën buzë një përroi në fshatin Zhapokikë 2.
Policia thotë se për këtë ngjarje janë identifikuar 3 persona. Dy prej tyre janë arrestuar, S.A. 71 vjeç dhe B.A. 43 vjeç, babë e bir. 72-vjeçari është vrarë me thikë nga 71-vjeçari dhe një person i tretë, i cili është i shpallur në kërkim. 71-vjeçari akuzohet për vrasje me paramendim të kryer në bashkëpunim, sigurim i kushteve për të kryer vrasje dhe përkrahje e autorit të krimit.
Ndërsa djali i tij akuzohet për përkrahje të autorit të krimit.
Nga hetimet e deritanishme dyshohet se 71-vjeçari ka organizuar dhe ka qenë aktiv në bashkëpunim me autorin tjetër në vrasje si dhe ka ndihmuar autorin e vrasjes, duke i siguruar kushte për të kryer këtë krim, ndërsa 43-vjeçari, duke mos kallëzuar këtë krim për të cilin dyshohet se kishte dijeni, ka përkrahur autorin.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.
