Vrasja e 67-vjeçarit Dod Mamli në Zhejë të Kurbinit dyshohet se ka si motiv gjakmarrjen, por nuk përjashtohen as pistat e tjera.
Sipas Klan News, mësohet se djemtë e viktimës, Dod Mamli akuzohen në lidhje me vrasjen e Naim Tafës më 23 Shtator 2015 në Mamurras.
SI NDODHI VRASJA E NAIM TAFËS NË 2015:
Një grindje mes 2 kushërinjve çoi në përplasjen me armë në Mamurras, ku për pasojë u shënua 1 viktimë dhe 4 të plagosur.
Enrik dhe Dorian Mamli u konfliktuan fillimisht me fjalë, pasi Enriku i kishte kërkuar Dorianit të mos shoqërohej me Naim Tafën, me të cilin ai kishte patur një konflikt jashtë shtetit.
Pas konfrontimit fizik, të dy kushërinjtë u larguan me automjetet e tyre, Doriani drejt spitalit të Mamurrasit për t’u mjekuar, ndërsa Enriku për në banesën e tij.
Rrugës për në kthim në hyrje të Stacionit të Trenit, automjeti tip Range Rover që drejtohej nga Enrik Mamli u përplas nga një mjeti tip Benz, ku ndodhej Naim Tafa, që ishte dhe burim i konfliktit mes dy kushërinjve.
Në përkrahje të Naim Tafës ishin dhe 4 persona të tjerë që prisnin pak metra larg automjetit, Arjan Tafa, Idriz Tafa, Besim Gjetani dhe Altin Çoku.
Në këtë moment, Enrik Mamli dhe Naim Tafa qëlluan me armë në drejtim të njëjri-tjetrit. Nga të shtënat gjeti vdekjen Naim Tafa, si dhe u plagosën 4 shokët e tij.
Viktima kishte vetëm pak javë që ishte kthyer nga Italia pasi kishte vuajtur dënimin për vjedhje. Ai zbriti në Rinas më 8 Shtator, si i deportuar me ndalimin e të drejtës për të qarkulluar në hapësirën “Shengen” për 10 vjet.
Në automjetin e Erikut, Policia gjeti 11 gëzhoja dhe armën me të cilën ai qëlloi, një tip automatik model 56. 26-vjeçari braktisi makinën 300 metra larg vendit të ngjarjes dhe pak orë pas krimit u arrestua nga Policia.
