Policia e Shkodrës ende nuk ka arritur të identifikojë autorët e atentatit me armë zjarri të së premtes që i mori jetën 36-vjeçarit, Elis Rroshkodoli. Ndaj këtij të fundit, u qëlluan 18 plumba, 14 prej të cilëve e qëlluan në trup, duke i shkaktuar vdekjen e menjëhershme.
Rroshkodoli u qëllua me armë në rreth orës 12:30 teksa ishte duke konsumuar kafen në një lokal, brend atë cilët ndodheshin vetëm katër persona, pronari, viktima dhe dy klientë.
Referuar deklarimeve të një prej dëshmitarëve, 36-vjeçari ka qenë vetëm në tavolinë në momentin që është qëlluar me armë. Personat e marrë në pyetje për ngjarjen kanë deklaruar se një mjet tip “Benz” gri është ndaluar para lokalit dhe më pas një person ka qëlluar ndaj 36-vjeçarit.
Autoritetet edhe pas dëshmive, ende nuk kanë rënë në gjurmët e autorëve. Hetimet vështirësohen edhe më shumë për shkak se lokali ku ndodhi ngjara nuk ka kamera sigurie.
Për të ndihmuar hetimet, autoritetet kanë marrë pamjet nga kamerat e tjera të sigurisë në zonë për të zbuluar lëvizjet e makinës së autorëve.
Elis Rroshkodoli ishte një person me probleme të theksuar me drejtësinë në Shqipëri dhe jashtë vendit. Në vitin 2010 dyshohet se Elis Rroshkodoli ka plagosur me armë zjarri shtetasin Hysni Bregu.
Më pas, në vitin 2014 dyshohet se është përfshirë në një vjedhje në Belgjikë, i arrestuar bashkë me një grup shqiptarësh.
Po në Belgjikë dyshohet se ka plagosur një shtetas. Në vitin 2023, është autor i dyshuar për plagosjen e një rumuni në Rumani nga ku është arratisur drejt Stambollit.
Ndërkohë policia përveç këtyre ngjarjeve ka mësuar edhe disa konflikte të tjera ku dyshohet se është përfshirë viktima. Policia ka dyshime se ekzekutorët e kësaj vrasje mund të jenë persona me pagesë dhe se porositësit janë të tjerë.
