Mediat italiane kanë publikuar detaje të reja në lidhje me vrasjen e 33-vjeçarit shqiptar Alfons Kola në Itali.
Sipas dëshmisë të personave të pranishëm në vendngjarje, Alfonsi e piu kafen në lokalin Leonessa të Calcinato-s, ku ishte klient i përhershëm.
Ai pati një bisedë të shkurtër me banakierin përpara se të dilte për të takuar personin që do t’i merrte jetën.
Ndërkaq, në dëshminë e tij pronari i lokalit ka rrëfyer detaje tronditëse. Ai shprehet se 33-vjeçari shqiptar ishte përpjekur të largohej me vrap ndërsa autori e ndoqi dhe e qëlloi për vdekje.
“Fonsi, siç e njihnim të gjithë, sapo kishte dalë nga dera e lokalit tim për t’u takuar me një burrë që askush nuk e kishte parë më parë. Disa klientë i panë fillimisht të bisedonin e më pas të diskutonin. Fonsi ia mbathi drejt sheshit Europa, ndërkohë që tjetri e ndiqte. Nga pamjet e sigurisë ai shihet duke u përpjekur që të fshihet pas një makine, ndoshta sepse ishte i plagosur”, rrëfen pronari i lokali.
Ngjarja ndodhi në pak çaste dhe asnjë nga të pranishmit nuk e kishte vënë re se sulmuesi kishte një thikë të madhe në dorë, me të cilën goditi 33-vjeçarin.
Thika është sekuestruar nga policia.
“Unë isha brenda lokalit dhe nuk e pashë drejtpërdrejt skenën: disa klientë vrapuan në panik, duke më thënë të thërrisja për ndihmë sepse Fonsi ishte në tokë, i gjakosur – vazhdon banakieri -. Dhe kështu bëra, atëherë dola: rreth tij kishte disa persona që mundoheshin ta ndihmonin. Ambulancat mbërritën pas 20 minutash: telefonuam edhe dy herë të tjera për të kërkuar ndërhyrje, duke pasur parasysh seriozitetin e situatës, ata u përgjigjën se po vinin: Mora disa lecka nga lokali dhe u përpoqëm të ndalonim gjakderdhjen me sa mundëm. Më në fund mbërriti ndihma dhe helikopteri që e dërgoi në spital”.- u shpreh banakieri.
Ndërkohë që klientët dhe kalimtarët bënë gjithçka për të shpëtuar 33-vjeçarin, autori u largua nga vendngjarja.
Mjaftuan pak minuta që karabinierët të identifikonin dhe të kapnin Petrit Gegën, I cili aktualisht ndodhet në paraburgim i akuzuar për vrasje.
