Një 23 vjeçar humbi jetën tragjikisht pasi u vra nga shoku i tij vetëm 17 vjeç në në lagjen “Guerrile” të Shkodrës, zona e njohur dhe ish-Zooteknika. Hermes Beqiri mori plagë të rënda dhe ndërroi jetë dje në spitalin e Traumës. Është arrestuar autori i krimit, Elvis Hoxha, 17 vjeç i cili ka pranuar të tregojë ngjarjen për policinë. Po kështu janë arrestuar edhe dy shokë të tjerë, Ditmir Harifi, 17 vjeç i dyshuar si bashkëpunëtor dhe Bekim Turishta për “Moskallëzim krimi”. Të rinjtë kanë qenë duke qëndruar në një lokal në Ish-Zooteknikë, kur mes tyre ka nisur debati për një kapele që ia kanë vënë njëri-tjetrit në kokë. Kaq është dashur që të rinjtë të konfliktohen. Pak çaste përpara plagosjes, mësohet se shtetasi Hermes Beqiri e ka rrahur 17-vjeçarin (autorin e krimit). Ky i fundit ka shkuar dhe ka marrë një automatik kallashnikov. Është afruar tek dera e lokalit dhe nga aty e ka qëlluar mbi të.
23-vjeçari Hermes Beqiri ka mbetur i plagosur rëndë në vendin e ngjarjes. Menjëherë autori bashkë me shokun e tij janë larguar nga vendngjarja me motor. Forcat e policisë kanë marrë informacion se 17-vjeçari fshihej në fshatin Frudë. Dhjetëra efektivë të drejtuar nga zëvendësshefi Saimir Rrustemi kanë shkuar në vendin ku fshihej. Pas pak minuta kërkimesh është arritur që të arrestohet, Elvis Hoxha, i cili mbante në dorë automatikun dhe fare pranë kishte edhe motorin me të cilin ishte larguar nga vendngjarja, që janë sekuestruar në cilësinë e provës materiale. Pas arrestimit, 17-vjeçari Hoxha dhe shoku i tij, Ditmir Harifi janë dërguar në policinë vendore të Shkodrës. Ai i ka thënë grupit hetimor se kanë qenë duke luajtur me një kapele ku më pas janë konfliktuar dhe Hermesi (viktima) e ka rrahur. Më pas ka thënë ai “kam marr automatikun në shtëpi dhe e kam qëlluar, por s’kam dashur ta vras…”
*Në foto viktima, Hermes Beqiri
