Gjykata e Dibrës ka lënë në burg Petrit Çakrajn dhe Fatjon Bushgjokën të arrestuar nga policia si autorë të dyshuar të vrasjes së 23-vjeçarit, Renis Dobra më 10 korrik në Burrel, raporton Tv Klan.
Ndërkohë vijojnë të jenë në kërkim dy vëllezërit e Fatjonit, Aleksandër dhe Kristi Bushgjokaj. Këta katër persona morën peng të riun Dobra dhe më pas e mbytën me litar.
Komunikimi i Policisë së Dibrës ditë më parë
Policia e Dibrës ka dhënë një sërë detajesh për vrasjen e 23 vjeçarit Renis Dobra, trupi i pajetë i të cilit u gjet më 9 korrik, në afërsi të liqenit të Ulzës.
Policia e Dibrës përmes një komunikimi për mediat disa ditë më parë zbardhi dinamikën e ngjarjes ku dha detaje për vrasjen e 23 vjeçarit Renis Dobra, trupi i pajetë i të cilit u gjet më 9 korrik, në afërsi të liqenit të Ulzës.
“55 vjeçari, P.Ç, banues në Tropojë, u arrestua në Golaj të Kukësit i dyshuar për “vrasje me paramendim” dhe rrëmbim personi, kryer në bashkëpunim. Shtetasi F.B, 34 vjeç, banues në Kamzë, u arrestua në Astir, i akuzuar për të njëjtën vepër penale, ndërsa u shpallën në kërkim K.B dhe A.B, vëllezërit e të arrestuarit F.B”, tha zëdhënësi i Policisë Dibër.
“Shtetasi R.D është marrë peng dhe më pas është mbytur me litar. Autorët e kanë hedhur automjetin e tij në liqen, por gjatë rënies, trupi i 23 vjeçarit ka mbetur pranë sektorit C, pa rënë në liqen”, shtoi më tej.
Autorët, theksoi ditë më parë zëdhënësi i policisë, nuk kanë qenë të veshur me uniformë policie dhe nuk kanë përdorur logo apo mjete të Policisë.
Sipas forcave policore, si motiv i vrasjes dyshohen mosmarrëveshjet për aktivitetin e paligjshëm të trafikimit të lëndëve narkotike, mes viktimës dhe autorëve.
“23 vjeçari ka qenë i dënuar në Gjermani për shpërndarje droge, si pjesë e një grupi të strukturuar kriminal”, deklaroi zëdhënësi i Policisë.
