Policia britanike ka shpallur në kërkim një shqiptar i cili akuzohet për vrasjen e prindërve të shokut të tij. I shpalluri në kërkim është shtetasi me origjinë shqiptare Ali Qazimaj, 42 vjeç.
Qazimaj dyshohet se ka vrarë me thikë britanikun Peter Stuart, 75 vjeç si dhe ka zhdukur gruan së tij, Silvias, 69 vjeçe.
Fqinjët e shqiptarit kanë folur për mediat britanike duke treguar se ai kishte kohë që mburrej se mund të vriste dikë. Madje sa herë që kishte grindje, zënka që ishin të shpeshta me fqinjët, gjëja e parë që ai thoshte ishte kërcënimi me vrasje dhe zhdukje.
Një grua 23-vjeçare ka treguar se si një herë Qazimaj kishte kërcënuar një grup djemsh se do t’i zhdukte.
“Do t’i fus ata në një fuçi dhe askush nuk do t’i gjejë më’, kishte thënë shqiptari.
Një grua tjetër që jeton pranë banesës ku rrinte shqiptari, tha: “Babai i tij është nga Praga dhe nëna e tij është nga Shqipëria. Ai është një njeri i çuditshëm, i tmerrshëm”.
Ajo tha se Qazimaj kishte qenë i shqetësuar në punë para se të zhdukej së fundmi.
Një tjetër fqinjë ka treguar se shqiptari i frekuentonte rregullisht lokalet e basteve, madje ai ka kryer një vepër penale në një dyqan bastesh në Basildon në vitin 2009, raporton panorama.
Policia sakaq ka konfirmuar se Qazimaj kishte “një lidhje” me familjen e të vrarit dhe të zhdukurës, por nuk ka saktësuar se çfarë lloj lidhje.
Një tjetër banor ka thënë se hera e fundit që e kishte parë shqiptarin dhe kishte folur me të ishte të shtunën në mëngjes. Sipas saj Qazimaj i ishte dukur “normal”.
“Ishte një bisedë normale, nuk kishte asnjë tregues se ai ishte nën ndonjë stres’.
Më tej thuhet se shqiptari ishte i fiksuar pas armëve dhe pas basteve.
