Jeff Bezos, themeluesi miliarder i kompanisë hapësinore Blue Origin, u përball me një moment të sikletshëm të hënën, pasi u rrëzua përpara kamerave teksa përpiqej të takonte të dashurën e tij, Lauren Sánchez, dhe pjesëtaret e ekuipazhit të parë të përbërë tërësisht nga femrat, që udhëtuan në hapësirë pas 60 vitesh.
Ngjarja ndodhi menjëherë pas kthimit të suksesshëm të raketës New Shepard, e cila bëri një fluturim 11 minutësh në hapësirë. Teksa kapsula u ul me sukses në shkretëtirën e Teksasit, Bezos u përpoq të arrinte i pari te dera e kapsulës për të mirëpritur ekuipazhin, por u pengua në tokë dhe ra me fytyrë.
Në bordin e raketës ndodheshin emra të njohur si Lauren Sánchez, Katy Perry, Gayle King, aktivistja për të drejtat civile Amanda Nguyen, regjisorja Kieranne Flynn, dhe shkencëtarja e NASA-s, Aisha Bowe.
Ky fluturim përfaqëson një moment historik për përfshirjen e grave në hapësirë dhe u përshkrua si emocional dhe frymëzues nga pjesëmarrëset.
Pas uljes, Katy Perry e nisi festimin duke u ulur në tokë dhe duke puthur dheun e Teksasit. “Ishte një përvojë e paharrueshme”, tha ajo, duke treguar një lule margarita. “Margaritat janë të zakonshme dhe rriten në çdo kusht. Janë të forta, të fuqishme dhe të qëndrueshme.”
Gayle King e përshkroi përvojën si “të qetë dhe paqësore”. Edhe pse tani zyrtarisht është astronaute, ajo ende ndjehet e befasuar nga kjo ide. “Nuk mund ta besoj që jam një astronaute.”
Ngjarja u ndoq nga një publik i mbushur me fytyra të njohura si Oprah Winfrey, e cila nuk i mbajti dot lotët teksa shikonte mikeshën e saj të ngushtë Gayle të ngrihej në qiell. Të pranishëm ishin edhe anëtarë të familjes Kardashian. Khloe Kardashian u shpreh për mediat e Blue Origin: “Është e pabesueshme. Të lë pa frymë.”
Pavarësisht momentit të sikletshëm të Bezos, misioni u konsiderua një sukses i jashtëzakonshëm për eksplorimin komercial të hapësirës dhe fuqizimin e grave në këtë fushë.
