Burrë e grua kanë dëshmuar në polici për vrasjen e 41 vjeçares Vera Tota në Zheje të Kurbinit. Vjehrri Ndoc Tota e qëlloi me levë në kokë nusen e djalit nuk i marrë jetën mizorisht mëngjesin e së mërkurës, por në polici ai deklaroi se e bëri për vetëmbrojtje. Autori i krimit dhe gruaja e tij (vjehrra e viktimës) thanë se nusja i kishte dhunuar edhe herë të tjera kur djali nuk ishte në shtëpi.
“Po, unë e kam vrarë nusen e djalit. E godita me levë Verën, pasi teksa po grindeshim, ajo tentoi të më rrihte. Nusja e tim biri më ka rrahur edhe dy raste të tjera, por për hir të fëmijëve dhe turpit të opinionit nuk e kam denoncuar, por e kam mbyllur brenda shtëpisë këtë marre”, është shprehur gjatë marrjes në pyetje nga oficerët e policisë, Ndoc Tota. “Më vjen keq që ka vdekur për të vetmen gjë se ka dy fëmijë të vegjël. Por tashmë, kjo gjë ndodhi. Po e përsëris jam përpjekur të vetëmbrohem”, ka vijuar ai.
Pak minuta pas arrestimit në flagrancë të Ndoc Totës, policia e Kurbinit ka shoqëruar edhe bashkëshorten e autorit të krimit. Sipas policisë, bashkëshortja e 75-vjeçarit ka thënë se “Vera ka tentuar të rrahë bashkëshortin tim dhe nuk ishte hera e parë që e kryente një gjë të tillë. Në atë moment burri im është përpjekur të vetëmbrohet. Për të mos u turpëruar, ai ka marrë një levë dhe e ka goditur direkt nusen pa e menduar se mund t’i shkaktonte vdekjen.
Ndërsa, dy fëmijët e djalit 10 dhe 15 vjeç ishin në gjumë dhe nuk e kanë parë skenën e krimit”, është shprehur gruaja e autorit të krimit. Ndërsa, bashkëshorti i viktimës është kthyer menjëherë nga puna, pasi është lajmëruar nga nëna e tij për krimin e ndodhur në familje.
