Në emisionin “Opinion”, gazetari Artan Hoxha ka zbuluar detaje në lidhje me mënyrën se si është futur arma në sallën e gjyqit e cila u përdor nga Elvis Shkambi për të vrarë në ambientet e Gjykatës së Apelit, gjyqtarin Astrit Kalaja.
Hoxha thotë se në Gjykatë nuk ka punuar skaneri që kontrollon personat kur futen në ambientet e institucionit, por kanë punuar kamerat.
Sipas gazetarit, Shkambi ka patur një pistoletë të vogël me pesë fishkë të fshehur në brez. Ai tha më tej se të pestë plumbat janë qëlluar brenda në sallë dhe pas krimit autori e ka dorëzuar armën te oficeri i sigurisë dhe nuk ka bërë rezistencë në momentin e arrestimit.
“Sot nuk ka punuar skaneri, por ka punuar kamerat dhe është zbardhur i gjithë mekanizmi se si është futur arma. Është e filmuar e gjitha. E ka patur në brez, ka patur një pistoletë të vogël mini-glou, është me kalibër të vogël ka patur vetëm 5 fishek. Në rastin konkret, kamerat e sigurisë kanë treguar që ka patur pistoletën në brez. Një pistoletë me 5 fishekë, i ka qëlluar të gjithë fishekët në sallë, kur ka dalë nga salla i ka dorëzuar armën oficerit të sigurisë dhe ka dalë në oborrë pa armë. E gjithë kjo është me paramendim, e ka bërë gati dhe e ka gjetur sistemin në gjumë”,-tha Hoxha./Opinion.al
