Në konferencën e mbajtur ditën e sotme me ministren e Kulturës, Elva Margariti, kryeministri Edi Rama i pyetur nga gazetarët foli edhe për ndërtimin e Teatrit Kombëtar.
Kreu i qeverisë tha se tërmeti, pandemia e lufta që ka nisur në Ukrainë ka rritur çmimet në tërësi dhe çmimin e ndërtimit në veçanti. Rama theksoi se s’ka asnjë ndryshim sa i përket projektit të Teatrit.
“Për fat të keq u bëmë tani 3 vet që bëjmë plane e kemi projekte për të realizuar se vendi përballet me ndërhyrje masivisht të forta faktorësh jashtë nesh si tërmeti, pandemia e lufta që ka nisur në Ukrainë e cila ka goditur shumë në aspektin e rritjes së çmimeve në tërësi e çmimeve të ndërtimit në veçanti. Jemi duke diskutuar për shkak të këtij fakti të fundit që ka pasur një ndikim jo të vogël në industrinë e ndërtimit.
S’ka asnjë ndryshim sa i përket projektit të Teatrit, gjithë problemi qëndron te kalimi i vështirë nga letrat te zbatimi i projektit për shkak të rritjes së çmimeve.
Po rishikojmë manualin që kemi për këtë qëllim se është e kotë që me manualin ekzistues ti kërkosh kompanive të marrin pjesë në gara e të bëjnë investime që janë de fakto shumë më të shtrenjta se sa çfarë figurojnë në manualin e vjetër.
Po merremi me këtë e besoj që do gjejmë një zgjidhje e Teatri Kombëtar do ndërtohet si është projektuar e si jemi zotuar.
Por jo të gjitha planet mund të zbatohen në afatet e parashikuara kur mes teje e afatit futet një ngjarje as as parashikohet as evitohet”, tha Rama./Opinion.al
