Pasagjerët që udhëtojnë përmes Rinasit janë përballur shpesh me vonesa dhe anulime të fluturimeve. Por, kush janë kompanitë më problematike të fluturimeve në Shqipëri?
Autoriteti i Aviacionit Civil publikoi për herë të parë listën nominale të shoqërive ajrore, të cilat kanë bërë më shumë vonesa dhe anulime, duke i lënë pasagjerët të presin në aeroport.
Sipas raportit, për vitin 2018, kompania me numrin më të lartë të vonesave ishte “Fly Ernest”. Përgjatë të gjithë vitit të kaluar, “Fly Ernest” ka bërë më shumë se 72 vonesa mbi 2 orëshe dhe 14 anulime të fluturimeve.
Pas saj, në vendin e dytë renditet menjëherë “Blu Panorama”. Sipas Autoritetit të Aviacionit Civil, gjatë vitit që lamë pas “Blu Panorama” bëri 71 vonesa mbi 2 orëshe, ndërkohë që anuloi 6 fluturime të planifikuara.
Në vendin e tretë dhe të katërt në listën e kompanive më problematike renditen “Albaëings”, me 37 vonesa mbi dy orëshe, dhe “Adria” me 8 vonesa.
Ligjet në fuqi u japin të drejtë pasagjerëve, që në rast vonesash apo anulimi të fluturimeve, të përfitojnë kompesim deri në 250 euro nga shoqëritë ajrore. Nga të dhënat zyrtare rezulton se, për vitin e kaluar kompanitë ajrore kanë pranuar 1.200 kërkesa për kompesim, e deri tani kanë realizuar 700 të tilla.
Sipas Autoritetit të Aviacionit Civil, “Blue Panorama”, pavarësisht problemeve me vonesat e shumta të regjistruara në vitin 2018, rezulton kompania më korrekte për pagesën e kompensimeve. Gjatë vitit të kaluar, kjo kompani kompensoi 500 pasagjerë.
Ndërkohë që “Fly Ernest”, pavarësisht se renditet si kompania më problematike për shkak të vonesave apo anulimit të fluturimeve, ka kryer vetëm 96 kompensime. / TCH
