Presidentja e Komisionit Evropian, Ursula von der Leyen, do të nisë sot një vizitë katërditore në Maqedoninë e Veriut, Kosovë, Mal të Zi, Serbi dhe Bosnjë e Hercegovinë.
Lajmi është bërë i ditur përmes një njoftimi të lëshuar nga Zyra e Bashkimit Evropian në Prishtinë.
Në njoftim theksohet se ky do të jetë një rast për të diskutuar bashkëpunimin dypalësh dhe veçanërisht për t’u prezantuar më në detaje udhëheqësve rajonalë Planin e Rritjes së BE-së për Ballkanin Perëndimor.
Von der Leyen, nesër do të jetë në Prishtinë ku do të zhvillojë takime me kryeministrin kosovar Albin Kurti dhe presidenten e Kosovës, Vjosa Osmani.
“Të hënën ajo do të udhëtojë për në Prishtinë, ku do të takohet me Presidenten, Vjosa Osmani dhe kryeministrin e Kosovës, Albin Kurti”, thuhet në njoftim.
Pas vizitës në Prishtinë, Von der Leyen pasdite do të udhëtojë për në Beograd. Atje ajo do të takohet me presidentin e Serbisë, Aleksandar Vuçiç, si dhe me kryeministren, Ana Brnabiç.
