Prodhuesi i vodkës suedeze Absolut ka thënë se po ndalon të gjitha eksportet në Rusi pas thirrjeve për bojkotimin e markës që nisën në Suedi dhe në mediat sociale.
Kompania Absolut tha të martën se “ka vendosur të ndalojë eksportin e markës së saj në Rusi”.
Stephanie Durroux, shefi ekzekutiv i kompanisë Absolut, tha në një deklaratë se kompania po ushtron “detyrën e saj të kujdesit ndaj punonjësve dhe partnerëve tanë, ne nuk mund t’i ekspozojmë ata ndaj kritikave masive në të gjitha format”.
Pronari i Absolut Pernod Ricard në prill konfirmoi për agjencinë e lajmeve AFP se rifilloi disa eksporte në Rusi, pasi më parë i ndaloi ato në mars 2022 pas pushtimit rus të Ukrainës.
Kompania tha se, që nga nëntori i vitit të kaluar Rusia kishte ndryshuar rregulloret e importit duke lejuar importet paralele të alkoolit pa lejen e importuesve të autorizuar, duke anashkaluar kështu sanksionet e BE-së.
Pernod Ricard theksoi se vendimi për të rifilluar eksportet u mor pjesërisht për të mbrojtur stafin e saj në Rusi nga “përgjegjësia penale” dhe akuzat për “falimentim të qëllimshëm”.
Vendimi ngjalli kritika masive duke përfshirë politikanë të shquar në Suedi.
Kryeministri Ulf Kristersson tha se ishte “shumë i befasuar” kur mësoi për vendimin.
Të tjerë bënë thirrje për bojkot, duke e quajtur atë një “kolaps moral” dhe një “dhuratë për Putinin”, duke iu referuar presidentit rus Vladimir Putin./Opinion.al
