Rritja përdorimit të biçikletave në kryeqytet padyshim që ka rritur edhe numrin e vjedhjeve të raportuara në polici. Ky është një problem veçanërisht i vështirë për tu adresuar pasi hajdutët zakonisht vjedhin në errësirë dhe i shesin shpejtë biçikletat duke humbur gjurmët.
Por sot policia e Tiranës ka njoftuar arrestimin e një 28-vjeçari nga Durrësi i cili ka kryer të paktën 7 vjedhje biçikletash në Tiranë.
Shërbimet e Komisariatit të Policisë Nr.3, nisur nga kallëzimet e bëra nga disa qytetarë që u kishin vjedhur biçikletat, kanë organizuar punën për zbardhjen e këtyre rasteve dhe kapjen e autorëve. Në kuadër të kësaj pune është finalizuar sot operacioni “Çiklisti”, nga i cili u arrestua G.B 28 vjeç, banues në Durrës. Në momentin e ndalimit në rrugën “ Don Bosko”, Tiranë , Policia i gjeti këtij shtetasi 4 biçikleta të vjedhura, si dhe sendet që përdorte për kryerjen e vjedhjeve, konkretisht: thikë, kaçavidë, çelsa të vegjël biçikletash, pinca, kapele për maskim etj.
Nga hetimet e kryera dhe provave filmike sipas policisë ky shtetas është autor edhe i 3 vjedhjeve të tjera biçikletash, të ndodhura gjatë muajve mars-prill të këtij viti në Tiranë.
Gjithashtu është proceduar në gjendje të lirë dhe shtetasi E.Gj.,41 vjeç banues në Tiranë për veprën penale “Përvetësim i sendeve të vjedhura”.
Materialet procedurale do t’i referohen Prokurorisë pranë Gjykatës së Shkallës Parë Tiranë për veprime të mëtejshme. /Opinion.al
