Dy keqbërës shqiptar të moshës 29 vjeç janë arrestuar nga karabinierët italianë gjatë një maksi kontrolli të kryer në lagjien Corveto në Milano. Çifti i keqbërësve u ndalua në një postobllok në Bachiglione.
Oficerët e policisë e ndoqën makinën dhe në brendësi dalluan një tablet, një lap top dhe disa xhevahire.
Midis ekranit dhe tastierës së kompjuterit u gjet një kartelë klinike e një gruaje nga Salvadori.
Duke patur dyshime, karabinierët kontaktuan me zonjën e kartelës, duke e pyetur nëse kishte pësuar ndonjë grabitje.
Gruaja, që nuk kishte shkuar akoma në shtëpi, konfirmoi pak minuta më vonë grabitjen.
Të dy djemtë, të zënë në kurth nga kartela mjekësore e gruas, të cilën e kishin vjedhur gabimisht, u arrestuan, ndërsa sendet iu kthyen gruas.
