Në orët e para të mëngjesit të sotëm, në Vlorë është djegur një tjetër makinë. Një fuoristradë në pronësi të shtetasit R.M, është shkrumbuar nga zjarri pranë gjykatës së Vlorës. Sipas disa burimeve, zjarri është vendosur qëllimisht, por Policia nuk e ka përjashtuar edhe mundësinë e një shkëndije elektrike që ka provokuar shpërthimin.
Por siç edhe është raportuar në media, djegia e makinave në Vlorë është kthyer në një “ritual” të përjavshëm, ndërsa deri më tani policia nuk ka arritur të zbulojë asnjë prej autorëve.
Pesë ditë më parë, më 16 mars në lagjen “Lirim” u dogj një makinë tip “Opel Vectra” në pronësi të shtetasit G.H, ndërsa ekspertët e policisë thanë se dyshonin në një zjarrvënie të qëllimshme.
Më 8 mars, një makinë tip “Benz” është djegur në orët e para të mëngjesit në lagjen “Pavarësia”. Pronari i mjetit ishte shtetasi me iniciale L.B, por mësohet se makina përdorej nga bashkëshortja e tij M.B, punonjëse në Task-Forcën e Tatimeve.
Më 26 shkurt, pesë automjete u shkrumbuan gjatë natës në një lagje pranë “Ujit të Ftohtë” në Vlorë. Zjarrëvënia ishte e qëllimshme, pasi dy prej tyre i përkasin një zyrtari të Bashkisë, por Policia ende nuk ka zbuluar autorët.
Më 26 janar, po në zonën e “Ujit të Ftohtë”, u dogjën tre makina gjatë natës, teksa ishin të parkuara. Fillimisht u dogj një makinë “Smart”, e më pas dy makinat e tjera “Land Rover” dhe “Audi”.
Më 7 nëntor 2018, një makinë “BMW-X5” është djegur rreth orës 03:30 në rrugën “Gjergj Kastrioti”. Ajo i përkiste 31-vjeçarit E.P, jurist në hipotekën e Vlorës.
Më 9 shtator 2018, në lagjen “28 nëntori”, i është vënë flaka një makine “Benz” në pronësi të 27-vjeçarit R.B. Megjithë ndërhyrjen e zjarrfiksëve, makina u shkrumbua plotësisht.
Këto janë vetëm disa nga rastet e djegieve të makinave në Vlorë. Kryesisht makinat kanë qenë në pronësi të zyrtarëve lokalë të qytetit bregdetar, ndërsa Policia e Shtetit ende nuk ka arritur të zbulojë asnjë prej autorëve./Opinion.al
