Fjalimi i disa ditëve më parë i një studenteje përpara ambasadores së Bashkimit Europian për mungesën e lirisë të së shprehurit në Shqipëri vijon ende të mbetet në kujtesën e Romana Vlahutin.
Nga qyteti i Shkodrës, ku ajo mori pjesë në aktivitetin kushtuar Ditës së Europës ka folur për 22-vjeçaren Flogerta Krypa.
“Ishte një takim vërtet i rëndësishëm për integrimin dhe ajo vajzë nuk u rebelua, por tha atë mendonte dhe kjo është demokracia. Më gëzoi që pati kurajon ta bënte këtë dhe unë u ndjeva mirë. Unë i ftova të rinjtë që të na tregojnë edhe ata disa gjëra, jo thjesht të na dëgjojnë ne. Kjo është fillesa e demokracisë, kur ti beson diçka dhe ke lirinë që ta shprehësh atë”, tha ambasadorja, e cila u shpreh se të rinjtë duhet të rebelohen, raporton express.
Komentet, Vlahutin i bëri teksa prezantoi programin e festimeve për Ditën e Europës, krah kryebashkiakes së Shkodrës Voltana Ademi.
