I ftohti polar ka mbërthyer Shqipërinë, duke sjellë temperatura të ulëta dhe reshje dëbore në zonat malore, ndërsa pjesa tjetër e territorit është përfshirë nga shiu.
“Dita e diel do të sjellë një rënie të menjëhershme të temperaturave, vlerat minimale në minus 4, 5 gradë Celsius në qytetet e zonave malore, më të thella edhe minus 7. Maksimalja jo më shumë se 11 gradë Celsius në Ultësirën Perëndimore”, tha Hakil Osmani, sinoptikan.
Nisur nga situata Agjencia Kombëtare e Mbrojtjes Civile u kërkon strukturave vendore dhe qendrore të jenë në gatishmëri dhe të marrin masa për menaxhimin e reshjeve.
Harta e reshjeve të dëborës që pritet të zbresin edhe në qytetet e zonave malore do të zgjerohet edhe më tej ditën e diel. Gjasat janë që dëbora të përfshijë edhe Dajtin, por jo në sasi të mëdha.
“Zonat, të cila do marrin reshje të konsiderueshme dëbore është verilindja, Kukësi, Peshkopia, Puka, duke bërë që të kemi një sasi edhe mbi 50 cm. Ndërsa reshjet më të dukshme do jenë në jug, herë pas here në formën e rrebesheve, të shoqëruara edhe me stuhi lokale ere”, tha sinoptikani.
Të dielën shpejtësia e erës pritet të kalojë mbi 65 km për orë. Për shkak të erës së fortë, Nisjet dhe mbërritjet për linjat Durrës-Bari dhe Bari-Durrës për 12 Janarin janë pezulluar. Problem do të jenë edhe ngricat.
“Ngrica që nga Bajram Curri deri poshtë në Gjirokastër”, tha Osmani.
Fillim java do të sjellë një tjetër rënie të temperaturave deri në minus 10 në verilindje. Moti përmirësohet nga pjesa e dytë e ditës së hënë.
“10-ditëshi i dytë i muajit, parashikohet me temperatura të ulëta”, tha Osmani.
10-ditëshi i dytë i këtij muaji pritet të jetë kryesisht me mot të qëndrueshëm.
