Teksa në Shkodër po zhvillohet ceremonia mortore e dy vëllezërve Astrit dhe Brahim Bilali, të cilët u vranë në një atentat ditën e djeshme, vjehrri i Astrit Bilalit ka kërkuar nga shteti që të zbardhë ngjarjen, pasi është shuar një familje e tërë.
Fahri Vejuka, i cili është edhe gjyshi i ish-boksierit të Vllaznisë Asmer Bilali, bëri një apel për institucionet që të gjejnë sa më shpejt vrasësit, ndërsa pati një lutje që nipi i tij të rrijë të paktën dy ditë në shtëpi, për të pritur vizitat.
“Shpresojmë që shteti të gjejë autorët e vrasjes, sepse është një ngjarje shumë e rëndë që ka ndodhur. Pothuajse është shuar një familje, pas kësaj ngjarjeje dhe institucionet do të bëjnë detyrën e tyre për çfarë ka ndodhur. Asmer Bilali është djali i Astrit Bilalit dhe është në burg prej disa muajsh. Ai do të jetë vetëm në varrim, por ne kërkojmë që të lihet të paktën dy ditë tek banesa e tij, për të pritur njerëzit, sepse nuk ka askënd. Vëllai i tij 23 vjeç është shumë i sëmurë dhe nuk është askush tjetër. Shpresojmë që institucionet të vendosin dorën në zemër dhe të na mirëkuptojnë në kërkesën tonë. I falënderojmë që e kanë lejuar të jetë në varrim, por kërkojmë të qëndrojë pak më gjatë, të paktën dy ditë dhe normalisht me prezencën e policisë. Për të tjerat, shteti të bëjë detyrën dhe nëse ka bërë diçka, mund të dënohet, por sot i kërkojmë ta lejojnë të paktën dy ditë që të qëndrojë, sepse do dalin dy kufoma nga shtëpia jonë”, ka thënë për mediat Fahri Vejuka.
Më herët gjatë ditës së sotme, Asmer Bilali i cili mbahet në burg si anëtar i bandës “Bajri” i ka kërkuar zyrtarisht Drejtorisë së Përgjithshme të Burgjeve që të jetë i pranishëm në varrimin e babait dhe xhaxhait të tij./Opinion.al
