Policia e Tiranës ka finalizuar një tjetër operacion hetimor për zbardhjen e disa vjedhjeve në banesa dhe lokale, duke identifikuar tre autorë të dyshuar.
Mësohet se dy prej tyre janë vënë në pranga, ndërsa një 21-vjeçar është shpallur në kërkim.
Uniformat blu kanë sekuestruar disa bizhuteri dhe një shumë lekësh, të dyshuara të vjedhura, si dhe një automjet.
“Si rezultat i hetimeve të kryera rreth denoncimeve për vjedhje në banesa dhe në subjekte, shërbimet e Komisariatit të Policisë Nr. 6 në bashkëpunim me Komisariatin e Policisë Nr. 2, mundësuan zbardhjen e autorësisë së 4 prej këtyre rasteve. Konkretisht:
-u vu në pranga shtetasi E. D., 20 vjeç dhe u shpall në kërkim shtetasi E. G., 21 vjeç, pasi dyshohet se gjatë periudhës maj-qershor, kanë vjedhur para dhe sende me vlerë, në 1 banesë dhe në 2 lokale;
-u vu në pranga shtetasi A. K., 33 vjeç, pasi dje, dyshohet se ka vjedhur një shumë parash në një banesë në fshatin Arbanë.
Punohet për kapjen e 21-vjeçarit, si dhe për zbardhjen e vjedhjeve të tjera që mund të kenë kryer këta shtetas”, njofton policia.
Materialet procedurale iu referuan Prokurorisë së Tiranës, për veprime të mëtejshme./Opinion.al
