Kreu i Partisë Demokratike, Sali Berisha ka zbardhur detaje nga takimi që zhvilloi sot në burg me ish-deputetin demokrat, Ervin Salianji.
Pas takimit, Berisha tha për mediat se Salianji ndodhet në burg vetëm se i shërbeu Shqipërisë.
“Erdha këtu dhe takova deputetin e Kuvendit të Shqipërisë, që dergjet, vuan dënimin vetëm e vetëm se i shërbeu vendit, iu shërbeu qytetarëve, kreu detyrën e tij, obligimet e tij duke denoncuar në atë kohë, klanin më të rrezikshëm e trafiqeve në Shqipëri, klanin e Geron Xhafës.
Ervin Salianji, siç dihet, bëri publike regjistrimin e një gazetari guximtar në të cilën faktohej se, Agron Xhafa, njeri dhe ai me tre emra, drejtonte trafiqet nga gjiri i Vlorës drejt Italisë.
Agron Xhafa kishte dy vëllezër. Një vëlla nga gjaku, Fatmir Xhafën, një vëlla tjetër nga morali, Olsi Ramën. Kjo është e vërtëta.
Dhe, meqënëse, Salianji goditi me një të rënë dy klanet mafioze më të rrezikshme të Shqipërisë dhe të Ballkanit, klanin Rama dhe klanin Xhafa, u vërsulën kundër tij me të gjitha mjetet e mafies dhe sot ai vuan dënimin për shërbimin e madh dhe të çmuar që i bëri Shqipërisë”, tha Berisha.
Gjatë fjalës së tij, Berisha tregoi gjendjen e Salianjit brenda në burg dhe tha se bashkë me të ka folur për vazhdimin e betejës së opozitës.
”Natyrisht që njeriu që kufizohet nga liria nuk mund të mos jetë një situatë e papranueshme, për ndryshe vendosmëria e tij në këtë betejë është e plotë. Biseduam për vazhdimin e betejës sonë dhe kjo betejë do të përfundojë vetëm kur Fatmir Xhafaj dhe klani Rama të marrin dënimin konkret”, shtoi Berisha.
