Kryeparlamentarja e Shqipërisë Elisa Spiropali, ka zhvilluar takimin e parë në funksionin si kryetare e Kuvendit.
Spiropali ka zhvilluar një takim me kreun e Kuvendit të Kosovës, Glauk Konjufcën.
Lajmin e ka bërë të ditur përmes një postimi në rrjete sociale, ku shkruan se Shqipëria e Kosova kanë bashkëpunuar dhe do të bashkëpunojnë për integrimin e Kosovës, pranimin e shtetit të Kosovës në NATO dhe në organizata të tjera ndërkombëtare.
”Jam e lumtur që vizitën e parë miqësore në zyrë pas marrjes së detyrës së Kryetares së Kuvendit, e pata nga Kryetari i Kuvendit të Kosovës, z.Glauk Konjufca.
Kuvendi i Shqipërisë dhe Kuvendi i Kosovës kanë ndërtuar një bashkëpunim vëllazëror të shkëlqyer, jo thjesht protokollar, por funksional dhe praktik, mes kryetarëve, komisioneve parlamentare, grupeve parlamentare dhe deputetëve.
Memorandumi i Bashkëpunimit, nënshkruar në shtator 2022, krijoi një kuadër të përbashkët për bashkëpunimin parlamentar, i cili u pasua nga mbledhja e përbashkët e dy Kuvendeve, me rastin e 110-vjetorit të pavarësisë, më 27 nëntor 2022.
Të dy Kuvendet tona do të vijojnë të bashkëpunojnë për proceset integruese në Europë, mbështetjen e pranimit të Kosovës në NATO, Këshillin e Europës dhe përfaqësimin në organizatat ndërkombëtare.
Delegacionet e Kuvendit të Shqipërisë në organizatat parlamentare ndërkombëtare po lobojnë fort për rritjen e përfaqësimit, njohjeve dhe rolit ndërkombëtar të Kosovës.
Vizitën e parë si Kryetare e Kuvendit të Shqipërisë padyshim do ta mbaj në Kosovë”, shkruan Spiropali.
