Është Vitore Tusha gjyqtarja e parë në vend që kalon me sukses procesin e vetingut. Gjyqtare në Gjykatën Kushtetuese dhe pedagogë në universitet, Tusha ka rezultuar si person me integritet dhe pasuri të vënë përmes punës.
Vendimi u shpall sot nga Komisioni i Pavarur i Kualifikimit, kësisoj, gjyqtarja Tusha mund të vazhdojë punën në sistemin e drejtësisë.
Kujtojmë se dy kolegët e saj në Kushtetuese Besnik Imeraj dhe Fatos Lulo nuk kanë mundur ta kalojnë këtë proces të pastërtisë së figurës. Imeraj dha dorëheqjen nga sistemi gjyqësor dhe u referua nga Komisioni i Pavaruar i Kualifikimit në Prokurori, ndërsa Fatos Lulo u shkarkua nga detyra pasi dispononte pasuri të pajustifikuar.
Tupa gjyqësore e Komisionit të Pavarur të Kualifikimit përmendi raportin e ILDKPI, ku gjyqtarja Tusha rezulton me pasuri justifikuara. Raporti përshkruan se gjyqtarja kushtetuese i ka deklaruar pasuritë e saj, të tilla si banesë në Tiranë, 500 metra toke në Farkë dhe shtëpi në Gjirin e Lalëzit, për të cilën ka ende pa shlyer një këst. Edhe DSIK ka referuar se gjyqtarja Vitore Tusha ka figure të pastër dhe pa lidhje të dyshimta. E njëjta gjë konkludohet edhe për aftësitë profesionale të gjyqtares Tusha pas kontrollit të pesë dosjeve gjyqësore.
