Kryeministri Edi Rama ka komentuar sot sulmet kibernetike nga Irani, duke thënë se vetëm në 2024 kanë kryer 42 të tilla.
Në aktivitetin “Fuqizimi i AI në Shërbimet Publike Digjitale në Shqipëri”, Rama tha se pavarësisht se Irani është një nga fuqitë më të mëdha të terrorit digjital, Shqipëria është një nga fuqitë mbrojtëse kibernetike më të avancuar në Europë.
”Për informacionin tuaj, ne jemi sulmuar egërsisht nga Irani, në përpjekje për të fshirë çfarë keni krijuar në 10 vjet. Kemi qenë në fije të perit.
Irani është një nga fuqitë më të madha të terrorit digjital. E kemi zmbrapsur sulmin pa dëme të mëdha dhe dua t’ju informoj se vitin e kaluar kemi patur 42 sulme serioze, ndërsa në 2023 kemi patur 63.
Ju nuk dini asgjë për këto sepse sulmet që zmbrapsen nuk përbëjnë lajm. Kemi një nga fuqitë mbrojtëse kibernetike më të avancuara në Europë.
Duke përdorur talentet shqiptare. Kjo është një luftë e përditshme. I bëj thirrje sektorit privat të mos e nënvlerësojë rrezikun që vjen nga terroristët digjitalë, kemi ecur shumë mirë me bankat. Ka shumë boshllëqe. Armiqtë janë armiq. Gjejnë pika të dobëta dhe godasin”, tha Rama.
