Edhe në ditët e fundit të Shkurtit, pacientët e vegjël që kërkojnë ndihmën e specialistit pranë Urgjencës Pediatrike në QSUT, janë në numër të konsiderueshëm.
Sipas shefit të shërbimit të kësaj urgjence, Albert Lama ka një bashkëqarkullim të disa viruseve njëkohësisht.
“Ka një fluks më të shtuar në raport me stinët e tjera, për vetë faktin ka dhe virologjinë e stinës ku ne jemi. Kemi pasur prezencë të shtuar të influencës, qoftë A, qoftë B, sigurisht variantet e covidit ekzistojnë. Plus ka qenë dhe virusi HRSV ose virusi respirator sesencial që prek të vegjëlit”, tha Albert Lama.
Fëmijet e çerdheve dhe kopshteve janë më të prekurit nga këto probleme shëndetësore, ku dominon temperatura e lartë.
“Grupmosha më e prekshme është, po themi, nga 1 muajsh që ne i trajtojmë këtu se para moshës 1 muajsh është mosha patologjike që trajtohet në maternitet, deri në moshën 4 vjeç ose 5 po themi, moshën parashkollore. Kjo është grupmosha më e prekur. Kjo nuk do të thotë që preken grupmosha të tjera. Temperatura, gjendje e përgjithshme jo e mirë apo probleme gastrointensinale që shoqërohen me diarre, të vjella dhe fëmija duket i lodhur, i këputur, pra pak a shumë kjo është”, tha Lama.
Për të shmangur fluksin e panevojshëm në Urgjencën Pediatrike në QSUT, specialisti rekomandon kontaktin me mjekun e familjes.
“Rekomandimi im i parë është që prindit ta ndjekë pranë mjeku i familjes, për arsyen se njeh dhe historikun e sëmundshmërisë së fëmijës dhe në këtë kontekst, ndjekja bëhet më e mirë dhe më e plotë. Sigurisht, në varësi të gjendjes”, tha Lama.
Në javët në vijim, sipas specialistëve, bie intenstiteti i viruseve që janë në qarkullim, duke iu lënë vendin alergjive të pranverës.
Klan News
