Kryeministri i Hungarisë, Viktor Orban, u dekorua të premten me çmim shtetëror nga Milorad Dodik, lider i Republikës Sërpska, që është i sanksionuar nga Perëndimi.
Dodik ia dorëzoi Orbanit çmimin “Urdhri i Republikës Sërpska”, në një ceremoni të zhvilluar në Banjallukë, në kuadër të vizitës së tij në Bosnjë-Hercegovinë të vëzhguar nga afër prej zyrtarëve të Bashkimit Evropian, Presidencën e radhës të së cilës shteti i Orbanit do ta udhëheqë nga korriku.
Orban shprehu vërejtjen që Serbia, sipas tij, nuk po e merr trajtimin që meriton nga Evropa.
“Mendoj se Serbia nuk është trajtuar në mënyrë të drejtë nga Evropa. Serbia nuk po e merr njohjen që e meriton. Disi, Evropa nuk po e kupton se serbët janë të rëndësishëm për Evropën. Në Evropë nuk ka siguri pa serbët. Pa serbët brenda saj nuk do të ketë Bashkim Evropian të shëndetshëm”, ka thënë Orban.
Ai ka thënë se rajoni i Ballkanit Perëndimor po vuan dyfish, si pasojë e luftës në Ukrainë.
“Ballkani Perëndimor po vuan dyfish për shkak të luftës në Ukrainë. Merreni me mend, pas shumë diskutimesh ne në BE vendosëm që t’u japim 50 miliardë euro ukrainasve gjatë viteve të ardhshme. Dhe mendojeni tani, mbyllini sytë, e mendoni sikur prej tyre, 30 miliardë t’i merrte Bosnjë-Hercegovina si ndihmë, natyrisht, për t’u përgatitur për anëtarësim në Bashkimin Evropian”, është shprehur Orban.
Udhëheqësi pro-rus i Republika Sërpskas, Dodik, e mbrojti mbështetjen e tij për Rusinë, ndonëse është përfshirë në mesin e të sanksionuarve të Shteteve të Bashkuara të Amerikës, si dhe të Britanisë së Madhe.
