Një aksident i rëndë me të paktën 11 të vdekur dhe mbi 50 të tjerë të plagosur u regjistrua në pjesën veriperëndimore të Turqisë.
Të dhënat paraprake bëjnë me dije se në aksidentin që u regjistrua në autostradën e Marmarasë u përfshinë 7 automjete, 3 prej të cilëve autobusë dhe një kamion.
Pas njoftimit për situatën, xhandarmëria, shëndetësia, zjarrfikësit,dhe forcat e ndihmës së shpejtë shkuan menjëherë në vendngjarje.
Guvernatori i rajonit teksa ka folur në transmetim të drejtpërdrejtë pas aksidentit të tmerrshëm u shpreh se shumë nga viktimat humbën jetën pasi dolën nga automjetet e tyre dhe u përplasën nga të tjera automjete që nuk kishin fushëpamje.
Guvernatori Karadeniz deklaroi më tej se, të plagosurit janë dërguar në spitale dhe puna e ekipeve në rajon vazhdon. Ekipet vijojnë largimin e automjeteve nga rruga në rajonin ku ka mjegull të dendur.
“Aksidenti është shkaktuar fillimisht nga përplasja e disa makinave me kamionë të tonazhit të rëndë. Mendohet se disa nga personat që kanë humbur jetën në aksident kanë zbritur nga automjetet e tyre dhe janë goditur nga mjete të tjera që vinin nga pas”, u shpreh në deklaratën për mediat guvernatori.
Sakaq, në mediat turke janë publikuar pamjet e reja të aksidentit të regjistruara me dron. Në foto shihet se ekipet po punojnë ethshëm nën mjegullën e dendur dhe radhët e gjata të automjeteve të krijuara në autostradë.
