38-vjeçari, Fatjon Dervishi, që u ekzekutua me armë zjarri pak pas mesnatës në Katund të Sukthit, nuk ishte i vetëm në makinë, në kohën kur autorët kanë qëlluar mbi mjetin e tij me të paktën 15 plumba.
Mësohet se viktima ka qenë së bashku me një mikun e tij në makinë, i cili ka shpëtuar i palënduar.
Ai ka dëshmuar se ndaj tyre është qëlluar sapo kanë dalë nga një lokal nate.
“Dinamika e ngjarjes sipas policisë mbetet pak e vështirë për t’u zbuluar pasi nuk ka pasur shumë dëshmitarë në vendngjarje. Ajo çka shoku i vet i viktimës ka deklaruar, ka pohuar se po ktheheshin nga një lokal për të shkuar në shtëpitë e tyre, kur befas në rrugë persona të paidentifikuar kanë nisur të qëllojnë kundër tyre. Gjithçka ka ndodhur brenda pak sekondave dhe për shkak të errësirës e ka pasur të pamundur të shquajë personat që kanë marrë pjesë në atentat”, raportoi gazetarja e Klan News.
Kujtojmë se Fatjon Dervishi është nipi i një personazhi të njohur në zonën e Sukthit “Arapit të Sukthit”.
Ai është person me precedent kriminal në trafikun e lëndëve narkotike dhe i skeduar për vrasje. ‘Arapi i Sukthit’ në vitin 1991 është akuzuar për vrasjen e A.Cyrbja.
