Një tjetër ambasador rus është gjetur i vdekur duke e çuar në 6 numrin e diplomatëve rusë që kanë humbur jetën jashtë vendit në më pak se një vit. Kësaj radhe ishte ambasadori i Rusisë në Sudan, Mirgayas Shirinsky, ai që u gjet i vdekur në pishinën e rezidencës së tij në Khartoum të mërkurën, sipas “The New York Times”.
Sipas mediave ndërkombëtare, ai është diplomati i gjashtë që humb jetën jashtë vendit që prej zgjedhjeve të fundit presidenciale në Amerikë në nëntor të vitit të kaluar. Ministri sudanez i punëve të jashtme konfirmoi se ambasadori rus, rreth të 60-tave, ishte gjetur i vdekur por nuk dha arsyen e vdekjes. Ndërsa agjencia e lajmeve “AFP” citoi një zëdhënës të policisë, sipas të cilit ambasadori ishte gjetur pa jetë në pishinë.
Lista e ambasadorëve rus që vdiqën jashtë vendit:
Ditën e zgjedhjeve në Amerikë, diplomati 63-vjeçar Sergei Krivov u gjet pa ndjenja dhe me plagë në kokë në konsullatën ruse në New York. Zyrtarët rusë thanë se ai kishte humbur jetën pas një ataku në zemër.
Në muajin dhjetor, Ambasadori rus në Ankara, Turqi, 62-vjeçari Andrey Karlov u vra në një galeri artesh nga një atentator që pretendonte se po hakmerrej për viktimat siriane.
Në muajin Janar, konsulli rus në Athinë, 55-vjerçari Andrei Malanin u gjet i vdekur në banjën e apartamentit të tij. Policia tha se kishte humbur jetën për shkaqe natyrale.
Pak javë më vonë, diplomati Alexander Kadakin humbi jetën në Indi në moshën 68-vjeçare. Shkaqet? Probleme me zemrën.
Në muajin shkurt, Ambasadori i Rusisë në OKB për më shumë se një dekadë, Vitaly Churkin, u rrëzua përtokë në zyrën e tij dhe humbi jetën. Ekzaminimet pas vdekjes treguan se ai kishte vdekur pas një ataku në zemër.
Sipas zëdhënësit të Ambasadës ruse në Sudan, edhe Ambasadori Mirgayas Shirinsky dyshohet se ka humbur jetën pas një ataku në zemër.
Sipas websajtit të ambasadës, Shirinsky kishte lindur në vitin 1954 dhe fliste arabisht dhe anglisht.
Ai ishte një diplomat karriere, të cilën e nisi si Ambasador në Egjipt në vitin 1977 e më pas në Jemen, Arabi Saudite dhe Ruanda. Postin e Ambasadorit në Sudan e mori në vitin 2013. /tvklan.al
