Dhjetëra vatra zjarri vijojnë të jenë aktive në gjithë vendin.
Situata paraqitet më shqetësuese në zonat jugore.
Fatmirësisht, gjatë orëve të para të mëngjesit, forcat zjarrfikëse kanë arritur të shuajnë zjarrin në Parkun Natyror të Syrit të Kaltër.
Gjithsesi, kjo zonë mbetet me rrezik të lartë, pasi përgjatë gjithë segmentit rrugor Sarandë–Muzinë ka pasur zjarr gjatë natës, ku është djegur e gjithë bimësia.
Ka një riaktivizim të zjarrit pranë fshatit Peçë. Ky vend përbën një nyje shumë kritike dhe të rrezikshme për përhapjen e flakëve.
Situata e rëndë ishte edhe në Finiq, ku prej disa ditësh flakët po kalojnë nga njëri fshat në tjetrin. Në fshatin Leshnicë e Poshtme të Finiqit janë djegur disa banesa.
Vatër zjarri ka aktualisht pranë fshatit Krogji, por më pak e rrezikshme se një ditë më parë. Zjarri, ndërkaq, ka marrë drejtim nga fshati Kardhikaq. Ka dëme të shumta në gjithë zonën, ku veç pemëve frutore janë djegur edhe dhjetëra koshere bletësh.
Në terren ndodhen 30 punonjës të Forcave të Armatosura, dy zjarrfikëse dhe një avion nga ajri, i cili vepron prej mëngjesit.
Ndërkaq, zjarri i përhapur nga fshati Kodër-Lekël në Tepelenë dhe në drejtim të Gjirokastrës sot paraqitet nën kontroll, ndonëse kemi djegie të një sipërfaqeje të konsiderueshme mali dhe kullote.
Edhe në Poliçan situata mbetet problematike, sidomos në fshatin Rehovë, ku nga flakët është djegur një banesë dykatëshe. Shqetësuese vijon të mbetet situata në fshatin Plirëz, ku janë evakuuar banorët.
Situatë kritike në fshatin Xath të Fushë Arrëzit
Ndërkohë, në veri të vendit vijon të jetë problematike edhe vatra e zjarrit në Xath të Fushë-Arrëzit, e cila ra ditën e djeshme. Flakët janë përhapur gjatë natës, të favorizuara nga era e fortë. Vatra e zjarrit ka depërtuar në fshatin Flet dhe në vendin e quajtur “Kurorë Dardhe“.
Vatra ndodhet në një sipërfaqe malore dhe është shumë e vështirë të ndërhyhet nga toka. Kryesisht po digjen pisha dhe bimësi të ndryshme.
Ditën e djeshme, në fshatin Xath janë evakuuar banorët e dy banesave që rrezikoheshin nga zjarri. Aktualisht, këto banesa nuk paraqesin më rrezik.
Klan News
