Dhjetra pjesëtarë të një grupi militant pro-iranian, dhe përkrahësit e tyre, kanë qëndruar gjatë tërë natës para ambasadës amerikane në Bagdad të Irakut.
Forcat amerikane kanë përdorur gaz lotësjellës për të shpërndarë demostruesit, të cilët janë zemëruar nga vrasja e militantëve të lidhur me Iranin, gjatë sulmeve ajrore të SHBA-së më 29 dhjetor 2019.
Me thirrje anti-amerikane, protestuesit hodhën gurë në portën kryesore të kompleksit, hoqën kamerat e sigurisë dhe u vunë flakën disa objekteve. Situata përshkallëzoi kur disa prej tyre kaluan murin e ambasadës.
Më herët, presidenti amerikan, Donald Trump, fajësoi Iranin për sulmin dhe ka lëshuar një kërcënim për të, duke thënë se Irani “do të paguajë një çmim shumë të madh” për çdo dëmtim ose humbje të jetës.
“Ky nuk është një paralajmërim, por një kërcënim”, shtoi ai.
Më pas sekretari amerikan i mbrojtjes, Mark Esper, njoftoi se rreth 750 ushtarë menjëherë do të vendosen në rajon.
“Shtetet e Bashkuara do të mbrojnë njerëzit dhe interesat tona kudo që gjenden, në të gjithë botën”, tha Esper.
Nga ana e tij, Teherani mohoi të ishte prapa protestave të dhunshme.
“Zyrtarët amerikanë kanë guximin befasues për t’i atribuar Iranit protestat e popullit irakian kundër vrasjes së egër të të paktën 25 irakianëve”, tha zëdhënësi i ministrisë së Jashtme iraniane, Abbas Mousavi, përmes një deklarate.
Sulmi ndaj Ambasadës së SHBA-së në Bagdad, mund të jetë më i dhunshmi që nga sulmi i vitit 2012 ndaj një grupi diplomatik në Bengazi, Libi. Katër amerikanë, përfshirë ambasadorin Christopher Stevens, u vranë në atë sulm./Opinion.al
