Policia e Durrësit ka arrestuar ditën e sotme dy persona, njëri prej të cilëve punonjës në Drejtorinë e Ujësjellës Kanalizimeve Durrës, të cilët akuzohen se vidhnin dhe tregtonin ujë në mënyrë të paligjshme.
Sipas burimeve të policisë Seksioni për Hetimin e Krimeve Ekonomike dhe Financiare në Drejtorinë Vendore të Policisë Durrës në bashkëpunim me Policinë e Durrësit kanë finalizuar me sukses operacionin “PROSIA E FUNDIT”.
Si rezultat u arrestuan në flagrancë shtetasit A. Gj., 50 vjeç, banues në Durrës, me detyrë shofer pranë Drejtorisë UK Durrës dhe S. P., 56 vjeç, banues në Durrës.
A.Gj dyshohet se me automjetin e ndërmarrjes shpërndante ujë për subjekte dhe persona të interesuar kundrejt pagesës. Ndërsa S.P vidhte ujë në tubacionin e UKD duke e tregtuar në subjekte dhe persona të interesuar.
Materialet i kaluan Prokurorisë pranë Gjykatës së Shkallës së Parë Durrës në ngarkim të shtetasit A. Gj., për veprat penale “Vjedhja duke shpërdoruar detyrën” dhe “Shpërdorim i detyrës”, si dhe në ngarkim të shtetasit S. P., për veprën penale “Vjedhja”. /Opinion.al
