TIRANE- Banesa e një tregtari celularësh në Tiranë është vjedhur nga persona ende të paidentifikuar gjatë kohës që në shtëpi nuk ndodhej asnjë prej pjesëtarëve të familjes. Ngjarja ka ndodhur në rrugën “Vëllezërit Huta”, në kryeqytet, në një shtëpi private ku banon 56- vjeçari, me iniciale A.R.
Autorët e dyshuar të ngjarjes kanë thyer xhamin e ballkonit të shtëpisë dhe pasi janë futur brenda, kanë vjedhur paratë dhe bizhuteritë e floririt që kanë gjetur aty. Burime nga Policia e Tiranës thanë se ngjarja është denoncuar nga i dëmtuari, i cili në momentin që është kthyer në shtëpi, bashkë me familjen, ka gjetur xhamin e thyer dhe ka parë që mungonin paratë e bizhuteritë.
Në kallëzimin që ai ka bërë në Komisariatin nr.1, pretendon se i janë vjedhur 2200 dollarë, 450 euro, si dhe 72 mijë lekë që i kishte në kasafortë. Ndërsa hajdutët i kanë marrë edhe të gjitha bizhuteritë e floririt të bashkëshortes dhe të vajzës, me një vlerë të konsiderueshme. /panorama
