Profilet në Twitter të Bill Gates, Jeff Bezos dhe ish-presidenti Barack Obama u kompromentuan nga hakerat për të krijuar një skemë mashtrimi me Bitcoin.
Pre e hakimit ranë edhe llogaritë e Elon Musk, Joe Biden dhe Kanye West nga të cilat kërkoheshin dhurime në kriptomonedhë.
“Të gjithë më kërkojnë të jap”, thuhet në një status nga llogaria e Bill Gates. “Ju dërgoni 1000 dollarë, unë do t’ju dërgoj mbrapsht 2,000 dollarë.”
Twitter tha se ishte një sulm “i koordinuar” që synonte punonjësit e tij “me qasje në sistemet e brendshme”.
“Ne e dimë se ata [hakerat] e përdorën këtë qasje për të marrë nën kontroll shumë llogari që janë shumë të ndjekura (përfshirë të verifikuarat) dhe të shkruanin në emër të tyre,” tha kompania.
Ajo shtoi se “hapa të rëndësishëm” u morën për të kufizuar qasjen në sistemet e brendshme ndërsa hetimi i kompanisë është në vazhdim.
Ndërkohë, shefi ekzekutiv i Twitter Jack Dorsey ka postuar në Twitter: “Ditë e vështirë për ne në Twitter. Të gjithë ndjehemi shumë keq që kjo ndodhi”.
Dmitri Alperovitch, bashkë-themeluesi i kompaninë së sigurisë kibernetike CrowdStrike, i tha agjencisë së lajmeve Reuters: “Ky duket se është hakimi më i rëndë i një prej platformave kryesore të mediave sociale”.
Në llogarinë zyrtare të shefit të Tesla dhe SpaceX, Elon Musk u bë postimi që ofronte dyfishimin e çdo pagese në Bitcoin dërguar në adresën e portofolit të tij dixhital “për 30 minutat e ardhshme”.
“Ndihem bujar për shkak të Covid-19”, shtoi tweet-i, së bashku me një adresë të Bitcoin.
Tweetet u fshinë vetëm disa minuta pasi u postuan për herë të parë.
Por ndërsa u hoq tweet-i i parë nga llogaria e Musk, u shfaq një tjetër, pastaj një tjetër.
Të tjerë në shënjestër përfshijnë: reperin Kanye West, gruan e tij Kim Kardashian West, ish presidenti amerikan Obama, ish zv/presidenti i SHBA Joe Biden, i cili është kandidati aktual presidencial Demokratik, miliarderi i mediave Mike Bloomberg, aplikacioni i ndarjes së udhëtimit Uber, prodhuesi i iPhone Apple
Fushata e Biden tha që Twitter kishte “mbyllur llogarinë brenda disa minutave nga hakimi dhe kishte hequr statusin”.
Një zëdhënës për Bill Gates i tha agjencisë së lajmeve AP: “Kjo duket të jetë pjesë e një sulmi më të madh me të cilin po përballet Twitter”./ Opinion.al
