U desh një protestë masive e studentëve për të kthyer të gjithë sytë nga ata. Përpos tarifave të shtrenjta të universitetit, studentët kanë ngritur edhe shqetësimin e kushteve në konvikte. Ato kanë mbetur si në Mesjetë. Top Channel sjell një vëzhgim me kamera të godinës nr.1 në Qytetin Studenti.
Kjo është një nga dhomat e konvikteve në qytetin Studenti ku jetojnë 3 studente mes lagështirës në 15 metra katror.
“Kemi vetëm një lavaman, ku lajmë enët, sytë dhëmbët në mëngjes. Dhe nuk mjafton besoj për 3 goca në një ambient kaq të vogël”, shprehet një studente.
Një dhomë ku mësohet edhe gatuhet, dhe ku ngrohja mungon. Gjumi në dyshekët me njolla, apo dyshekë që u kanë dalë sustat nuk bëhet i qetë. Problem mbetet edhe ngrohja, pasi prej vitesh kaldajat nuk punojnë.
“Ngrohësen e kemi blerë vetë, dhe kjo tostierja, frigoriferi apo interneti janë të gjitha tek një prizë”, shprehen studentët.
Por ajo çka të alarmon është rreziku që u kanoset nga elektriciteti. Vetëm një javë më parë, 3 studenteve u shpërtheu e vetmja prizë që kanë.
Por vështirësitë nuk mbarojnë me kaq.
Dera është një problem tjetër për konviktet që kanë ballkon, pasi nuk kanë asnjë siguri.
Papastërtitë në tualetet e përbashkëta dhe oraret për të bërë dush është një shqetësim tjetër i studentëve, me dritaret pa xhama nga ku hyn i ftohti.
“Për më tepër nuk është vendosur dorë, apo të përmirësohen kushtet e kësaj dhome dhe kjo ka sjellë që salla studimi të kthehen në dhoma, e si pasojë tani ka vetëm dy salla studimi në dy godina”.
Të tre vajzat paguajnë nga 45 mijë lekë në vit për t’u strehuar në këto godina, dhe nëse vetëm 1/3 e pagesës do të investohej çdo muaj në dhomën e tyre, tregojnë studentet, kushtet në vitin e dytë të shkollimit të tyre do të ishin shumë më të mira. Dhe pyetja që ngrenë është ku shkojnë lekët?!
Në kultim e protestës studentore, Rama postoi një video në facebook, duke pretenduar se ka nisur investimi me vlerë 18.8mln€ per rikonstruksionin e konvikteve.
