Flitet për zgjedhje të lira dhe të ndershme, por kjo nuk ndodh as në zgjedhjet brenda partive, ku duket qartë një proces i deformuar. Në qytetin e Durrësit, 3282 anëtarë të Partisë Socialiste zgjedhin sot 33 delegatët që do të marrin pjesë në Kongresin e 19 marsit.
Por, delegatët që kanë emrat në listë nuk u besojnë shumë votuesve, ndaj i shoqërojnë ata dhe u diktojnë për cilën të votojnë. Pamjet e fiksuara tregojnë qartë se si funksionon procesi i votimit në qytetin e Durrësit.
Pavarësisht vendosjes së 7 qendrave të votimit për 3400 anëtarë të Partisë Socialiste në këtë qytet, të cilët u thirrën për të zgjedhur 33 delegatët e Kongresit, janë orientuar të votojnë jashtë qendrave të fshehta.
Anëtarët, të shoqëruar nga vetë delegatët, marrin në dorë fletët e votimit dhe pasi i mbushin së bashku në ambiente të ndryshme brenda Pallatit të Kulturës “Aleksandër Moisiu” dhe më pasi i hedhin ato nëpër kutitë e votimit.
Procesi i votimit nisi në orën 08:00 të mëngjesit dhe u mbyll në orën 16:00, në qendrën e votimit të vendosur në Pallatin e Kulturës. Në Qarkun e Durrësit kanë të drejtë vote 3400 anëtarë të Partisë Socialiste, të cilët do të “zgjedhin” 33 delegatët e kongresit./ Panorama.al
http://www.dailymotion.com/video/x3uovxc_ja-si-manipulohet-votimi-per-delegatet-e-ps-ne-durres_news
