Greqia është duke jetuar një ndër ditët e saj më të vështira përgjatë gjithë dekadës së fundit. Kryeministri Tsipras ka shpallur gjendjen e jashtëzakonshme për zonën e Atikës, pak kilometra nga Athina.
Disa vatra zjarresh të çelura njëkohësisht kanë shkaktuar të paktën 50 viktima, por mendohet se numri I të djegurve dhe të asfiksuarve mund të jetë shumë më I lartë.
Në media u fol edhe për tre shqiptarë të vdekur dhe 13 të tjerë të plagosur, por shifrat nuk janë zyrtare. Opinion.al, arriti të komunikojë me Ambasadën Shqiptare në Greqi, përmes numrit të vënë në dispozicion për shtetasit shqiptarë.
Burime nga Ambasada bëjnë me dije se ata janë në kontakt me autoritetet greke që po punojnë për të identifikuar viktimat dhe të lënduarit. Deri në këto momente ka informacion vetëm për një të lënduar, i cili po merr ndihmën në spitalin Evangelismos, por ambasada vijon të jetë në kontakt me autoritetet dhe komunitetin shqiptar. Deri në këto momente, në ambasadë nuk ka patur thirrje për ndihëm nga ana e shqiptarëve.
Mediat e të gjithë botës, tregojnë pamje të makinave të shkrumbuara, ndërsa viktima të karbonizuara shihen në rrugë.
Zjarrfikësit janë duke punuar për të normalizuar situatën dhe për të shpëtuar sa më shumë jetë njerëzish./ Opinion.al
