Artur Mahmutaj, ish-drejtori i Hekurudhave shqiptare u arrestua në Itali me 75 kg kokainë bashkë me 1 shqiptar tjetër dhe 3 italianë.
Duke folur mbrëmjen e djeshme në emisionin “Opinion”, gazetari Artan Hoxha tha se Mahmutaj është marrë me drogë dhe është akuzuar edhe dy vite më parë kur drejtonte këtë sektor të rëndësishëm në vend.
Në vitin 2015 në një magazinë në pronësi të tij u zbulua një magazinë kanabisi. Në janar të 2016 ai u arrestua, por u mbaj në paraburgim vetëm për 3 muaj, pasi gjykata vendosi masën detyrim paraqitje duke argumentuar se nuk është person me rrezikshmëri.
Në vendim thuhej se, vërtet vendi ku u gjet droga ishte në pronësi të Mahmutajt, por pas hetimeve është vlerësuar se ambientet nuk posedoheshin prej tij, por i ishin dhënë me qira shtetasit tjetër, Albano Gjinit. Por gjykata nuk ka marrë në konsideratë dëshminë e Kastriot Dyrmishajt, i kapur në vendngjarje nga policia.
Ai ka deklaruar se ishte punësuar nga Mahmutaj për të ushqyer 3 qen dhe se një muaj para aksionit kishte parë Mahmutajn bashkë me dy persona të tjerë që e kanë ndarë magazinën në dy pjesë dhe më pas kanë vendosur një sobë.
Dje ish-zyrtari shqiptar (emëruar nga LSI) u arrestua në Itali si i implikuar në trafikun e kokainës, ndërsa ngrihen dyshime të forta për vendimin e gjykatës së Durrësit të datës 3 mars 2016. Vendimi për lënien e tij në masë sigurie detyrim paraqitje është dhënë nga gjyqtarja Anita Mici. /Opinion.al
