Një zjarr ka përfshirë ish-parkun e Lushnjës mëngjesin e kësaj të enjte, duke pasuar kështu në djegien e 4 autobusave.
Sipas Klan News, mësohet se 3 nga këto autobusë janë djegur plotësisht, ndërsa i katërti pjesërisht.
Zjarrfikësit arritën të shuanin flakët pa u përhapur më tej për të shkaktuar dëme më të shumta, pasi kishte dhe mjete të tjera të parkuara në zonë. Sipas njoftimit të uniformave blu, dyshohet se një prej autobusëve ka marrë flakë aksidentalisht, duke përfshirë më pas dhe autobusat e tjerë.
Nga ajo që bëhet me dije, autobusët bënin linjat Lushnjë-Elbasan dhe Lushnjë-Divjakë.
Drejtuesit e autobusëve ndodhen sakaq në komisariat dhe po japin deklaratat e tyre.
“Në orët e para të mëngjesit të sotëm, në lagjen “Gafurr Muço” Lushnjë, në vendin e quajtur “ish-parku i autobusave”, dyshohet se në një autobus të parkuar ka rënë zjarr aksidentalisht e për pasojë janë përfshirë nga flakët edhe tre autobus të tjerë, në pronësi të shtetasve V. Z., B. M. dhe G. M..
Grupi hetimor ndodhet në vendngjarje dhe po punon për sqarimin e plotë të rrethanave të rastit“, njofton Policia.
