Komisioni i Ekonomisë ka miratuar me votat e mazhorancës dhe opozitës shtyrjen me 10 vjet të afatit për administrimin me koncesion të Minierës së Kromit, Fabrikës së Pasurimit në Bulqizë, Impiantit të Seleksionimit në Klos dhe Uzinës së Ferrokromit në Burrel.
Projektligji u kërkua nga Ministria e Energjisë, e cila në relacionin shoqërues renditi edhe disa prej avantazheve që sjell zgjatja e bashkëpunimit me ACR Holding, pjesë e Balfin Group.
Mbështetje ndaj këtij projektligji dha edhe deputeti socialist Ervin Bushati, si relator i çështjes.
Zgjatja e afatit të koncesionit, jo vetëm do të sillte të ardhura për ekonominë e vendit, por është parashikuar të ruhen vlerat e këtij aseti.
Ish – Kryetari i Bashkisë së Bulqizës, tashmë deputeti i Partisë Demokratike, Roland Keta, argumentoi përse do ta votonte këtë projektligj.
Koncesioni i Bulqizës është lidhur ngushtë edhe me jetëgjatësinë dhe shtimin e vendeve të punës në Uzinën e Ferrokromit në Elbasan, si dhe për minierat e kromit të Prrenjasit e Pojskës. Komisioni votoi ‘pro’ për shtimin e afatit kohor edhe për këtë koncesion.
Tv Klan
