Katër ditë pas dorëheqjes nga posti i ministrit të Brendshëm, Fatmir Xhafaj shfaqet në skenën politike krah Erion Veliajt.
Fatmir Xhafaj, i cili do të vijojë të qëndrojë në detyrë deri në momentin kur Meta të dekretojë emrin e Sandër Lleshit në postin e Ministrit të Brendshëm, me propozim të kryeministrit është parë në dëgjesën publike që është mbajtur me banorët e Njësisë nr 10 në Tiranë
Ai tha se Veliaj kërkon një mandat të dytë jo për të qëndruar në atë karrige, por për të shërbyer dhe për ta çuar përpara misionin e tij për transformimin e Tiranës.
“Ka njerëz që ulen në një karrige dhe janë të kënaqur se kanë kapur një karrige; ka njerëz që marrin pushtet dhe janë të lumtur që janë të pushtetshëm; ka njerëz që vijnë për të shërbyer, që kanë një mision që duan të lenë një gjurmë përmes mundësisë që u jep pushteti dhe ky është Erion Veliaj. Puna dhe rezultatet janë treguesi më i mirë, CV-ja më e mirë për cilindo. Erion Veliaj hyri për një mision dhe me punë, me rezultate, me atë çfarë ka bërë, është duke kërkuar një mandat të dytë, jo për të vazhduar të qendrojë në atë karrige, por për të shërbyer dhe për ta çuar përpara këtë mision. Gjëja më e mirë e tij është puna”, deklaroi Xhafaj.
