Policia e Shtetit ka nisur dhe një hetim për veprimet dhe mos veprimet e Policisë së Elbasanit, në periudhen ‘95 – ’97, për rastin e Zyra Hidës.
Nëna e tre fëmijëve rezulton se ishte vrarë në këtë vit në Hollandë.
Familjarët e mësuan lajmin nga një grup gazetarësh të televizionit hollandez “SBS 6”, që e gjetën familjen e saj në bashkëpunim me Televizionin Klan. Ata kishin bërë denoncim për Zyra Hidën, pas dyshimeve se ajo ishte trafikuar dhe po shfrytëzohej për prostitucion.
Por nga policia nuk kishin marrë asnjë përgjigje edhe pse i kishin dhënë emra konkretë të të dyshuarve, siç deklaruan djemtë e saj pasi mësuan se nëna u ishte vrarë, në rrethana të paqarta, Korrikun e vitit ’97, në Amsterdam.
Dy persona u denoncuan javën e kaluar, të dyshuar si autorët e trafikimit të Zyra Hidës.
Janë shtetasit me inicialet SH.M dhe G.S, të cilët janë shpallur në kërkim. Por veç atyre, policia po verifikon edhe rastet e denoncimeve në Policinë e Elbasanit.
Djemtë kërkojnë tashmë kthimin e eshtrave të nënës së tyre.
Gjendja Civile refuzon ta shpallë të vdekur atë, përpara se të verifikohet ADN –ja.
Gazetarët e televizionit “SBS” morën kampione të analizave të fëmijëve të saj, për të kryer këtë analizë në Hollandë dhe vetëm pasi të vijë përgjigjja në rrugë zyrtare, atëherë mund të nisin edhe procedurat për kthimin e eshtrave. /Tv Klan
