Organizatorët e garës së Çmimit të Madh të Spanjës në Moto GP, që zhvillohet në Montmelo (Katalunja), kanë konfirmuar sot se do të bëjnë disa modifikime në pistë pas aksidentit me pasojë vdekjen e pilotit vendës Luis Salom. Ky i fundit humbi jetën pas një aksidenti në kthesën e 12-të të kësaj piste në qershor të këtij viti, në provat e lira të kategorisë Moto 2. Një tragjedi që tregoi se siguria në garat e Moto GP është ende nivele jo të mira dhe nevojiten ndryshime radikale.
Në atë kthesë pati disa aksidente gjatë asaj fundjave, ndaj organizatorët kanë vendosur të bëjnë disa modifikime të pistës, për të evituar të tjera tregjedi. Pista katalanase do të shkurtohet dhe tashmë gjatësia e saj e re do të jetë 4,562 metra. Punimet për sistemimin e pistës së re do të nisin në janar të 2017-ës: Do të ndryshojë kthesa e parë në fund të pjesës së drejtë, që do të jetë e njëjtë me atë që përdoret në garat e Formula 1, ndërsa kthesa e 13-të do të kthehet në një “chicane” (kthesë dyshe).
