Këto janë pamjet e kamerave të sigurisë së supermarketit në rrugën kryesore të Kamzës, që tregojnë tentativën e grabitjes së një nate më parë nga një person i armatosur me kallashnikov.
Grabitësi, i maskuar, qëlloi disa herë me automatik, duke lënë të plagosur shitësen 19 – vjeçare, I. Dushku. Pas kësaj, ai largohet në një tunel mes pallatit ku gjendet supermarketi.
Pamjet filmike ekskluzive, të siguruara nga Televizioni Klan, tregojnë se herën e parë ai futet në supermarket, qëndron 6 sekonda dhe del për t’u larguar. Një kalimtar me bluzë të kuqe, shikon autorin dhe ecën qetësisht.
Gjatë këtyre momenteve, punonjëset afrohen dhe mbyllin derën.
32 sekonda më pas, teksa po largohet, ai kthehet edhe njëherë nga supermarketi. E shtyn me shkelm derën kryesore dhe bërtet: Do t’ju vras të gjithave!
Qëllon në drejtim të arkës me breshëri dhe e lëviz armën në të dy krahët. Sapo del nga marketi qëllon sërish në drejtim të trotuarit.
“Autori i grabitjes e mbrëmjes së të enjtes është larguar në korridorin e këtij pallati. Në momentin që është larguar, ai ka qëlluarme armën e zjarrit, tip kallashnikov, që kishte me vete, në ajër. Plumbat kanë kapur, xhamin e supermarketit, gjithashtu, edhe xhamat e biznesit që është ngjitur”.
Nisur nga dëshmitë e punonjësve të supermarketit dhe pamjeve filmike, hetimet janë shtrirë në dy pista.
E para është ajo e një grabitje me armë, e mbetur në tentativë.
Por ajo çfarë ka ndodhur, i ka shtyrë pjestarët e grupit hetimor të ngrenë dhe pistën e një konflikti të autorit me njërën nga punonjëset, që mendohet se autori e ka njohur më parë.
Ndërsa sipas ekspertëve, veprimet e autorit, duke mos marrë para nga arka e supermarketit janë shpesh herë dhe të pakontrolluara, çka potencialisht, me armën në dorë, mund të ishin shkaktuar viktima.
Një prej dëshmitarëve okularë sqaroi se, autori ka qenë i kamufluar me maskë, kapuç, xhup, pantallona të zeza, doreza, si dhe një palë atlete të përdorura.
Pavarësisht kontrolleve të shumta, policia nuk ka mundur ta arrestojë autorin.
