Një tërmet i fuqishëm me magnitudë 7.7 Rihter është regjistruar në orët e para të mëngjesit në Turqi duke shkaktuar qindra viktima, mijëra të plagosur, si dhe dëme të konsiderueshme materiale.
Lëkundja kryesore ndodhi rreth orës 02:16, ndërkohë që epiqendra ka qenë në provincën juglindore të Gaziantep, në kufi me Sirinë. Lëkundja kryesore është pasuar nga 50 tërmete të tjerë, më i madhi prej të cilëve me magnitudë 6.7 Rihter.
Zëvendëspresidenti Fuat Oktay bëri të ditur situatën aktuale dhe numrin e viktimave dhe të plagosurve deri tani.
Oktay bëri të ditur se kanë humbur jetën 284 qytetarë turk. Oktay deklaroi se janë 2 mijë e 323 të plagosur dhe 1710 objekte të shembura apo të dëmtuara në total.
Sipas raportimeve, lëkundjet janë ndjerë në 10 provinca juglindore të Turqisë, ndërkohë që viktima ka dhe në territorin sirian.
Autoritetet lokale turke kanë raportuar për shembjen e dhjetëra ndërtesave, në Gaziantep ashtu edhe në qendrat e afërta të Dijarbakirit dhe Malatyas. Dyshohet se disa persona janë bllokuar nën rrënoja.
Autoritetet turke kanë shpallur gjendjen e jashtëzakonshme dhe janë mobilizuar të gjitha ekipet e shpëtimit./Opinion.al
