Trajneri i Mançester Junajtidit, Zhoze Murinjo, është ndëshkuar me karton të kuq gjatë ndeshjes së Premier Ligës angleze mes ekipit të tij dhe Uest Hemit. Pasi arbitri ndëshkoi me karton të verdhë Pogbanë, Murinjo reagoi ashpër duke goditur me shqelm shishet e ujit që kishte afër, por një veprim i tillë i kushtoi atij largimin nga pankina për në tribunë.
Reagime të ngjashme kanë bërë më parë edhe trajnerët Antonio Konte dhe Besnik Hasi. Konte gjatë Kampionatit Europian “Francë 2016” nën drejtimin e Italisë ka goditur topin në një mënyrë të përafërt, por diçka e tillë nuk i kushtoi atij përjashtim nga loja si në rastin e Murinjos.
Megjithatë portugezi mund të ndihet me fat që nuk pati fatin e Besnik Hasit. Trajneri shqiptar në kohën që drejtonte Andërlehtin, pas përfundimit të një ndeshjeje, i acaruar nga paraqitje e ekipit të tij, goditi në tunel një thes me topa dhe u rrëzua duke rrëshkitur, çka krijoi një skenë mjaft komike.
