Ministri i Brendshëm, Saimir Tahiri ka bërë me dije në Opinion se nuk sheh ndonjë histori konspiracioni në lidhje me gjetjen me vonesë të konsensusit mes palëve në lidhje me miratimin e reformës në drejtësi.
Tahiri tha se në gjithë procesin që ka ndodhur deri në sot, PS ka kërkuar dhe ka lënë hapësirë për konsensus duke ftuar vazhdimisht të gjitha forcat politike në Parlament për të bashkuar votat dhe për të pas një reformë në sistemin e drejtësisë konsensuale.
Ai theksoi se kjo reformë do të bënte të mundur që ajo të kishte më shumë përgjegjësi, si dhe do të kishte po aq përgjegjësi në mënyrën e implementimit të reformës që është një proces ende më i vështirë sa ky që kalojmë sot.
“PS ka qenë konsistente në qëndrimin e vet, ne kemi theksuar vazhdimisht nevojën për t’u akorduar me ekspertët vendas dhe nga kjo pikëpamje duhet mirënjohur një procedurë e tërë e zhvilluar nga komisioni parlamentar me konsultimin e mbi 200-300 ekspertësh vendas dhe ndërkombëtar, e mbi 1 mijë ekspertësh të jashtëm të cilët janë konsultuar në këtë proces, gjë që e bën procesin transparent dhe gjithpërfshirës nga njëra naë, ndërsa nga ana tjetër, gjithmonë duke lënë vend për opozitën dhe për këdo që ka pasur pikëpyetje legjitime deri diku për përmbajtjen e reformës për të gjetur gjuhën e përbashkët dhe për të pasur një reformë konsensuale”, tha Tahiri.
