Një grup studentësh të fakultetit të Drejtësisë të cilët janë në ngujim prej disa ditësh kanë shkuar në zyrën e dekanit, Artan Hoxha me kërkesë të këtij të fundit. Nisur nga situata e agravuar në këtë fakultet, dekani u ka kërkuar studentëve të dalin nga ngujimi, sepse ndër të tjera mund të dëmtohen dokumentet. “Ju keni pasurinë e shkollës atje. Keni gjithë dokumentacionin. Po t’ju ndodhë gjë, ku shkoni?”, dëgjohet dekani në videon më poshtë. Po kështu dëgjohen studentët që kundërshtojne ndërprerjen e bojkotit dhe lirimin e sallave.
Por negociatat e dekanit me studentët për të liruar ambientet e fakultetit kanë vazhduar prej ditësh. Shqetësimin e tij, z. Hoxha e ka shprehur edhe publikisht në një intervistë për mediat, javën e kaluar, ku tha se “duhet të lirohen ambientet e katit të parë, ku është i gjithë dokumentacioni që lidhet me funksionimin e tij”.
Kujtojmë se tashmë forma e protestës së studentëve ka ndryshuar. Ata nuk dalin në rrugë e sheshe por kanë zaptuar ambientet e fakulteteve duke u ngujuar brenda. Aktualisht nuk zhvillohet mësim në pjesën më të madhe të fakulteteve të universiteteve të Tiranës dhe atij Politeknik.
